Tveir Bandaríkjamenn hlupu samtals yfir 100 km á HM

Bandaríkjamenn féllu úr leik á HM í fótbolta í gærkvöldi þegar þeir töpuðu gegn Belgum, 2-1, í framlengdum leik í 16 liða úrslitum.

Belgar voru í stórsókn nær allan leikinn, en Bandaríkin settu met í því að hreinsa oft frá marki sínu og þá setti markvörðurinn Tim Howardnýtt met yfir flestar markvörslur í einum leik á HM.

Það verður ekki tekið af bandaríska liðinu að það er gífurlega duglegt þó fótboltahæfileikana skorti í suma leikmenn þess. Þegar litið er á tölurnar yfir þá sem hlaupið hafa mest á mótinu til þessa eru tveir Bandaríkjamenn í efstu þremur sætunum.

Enginn hefur hlaupið meira en Michael Bradley sem virðist alveg þindarlaus inn á fótboltavellinum. Hann hefur spilað allar 390 mínúturnar á mótinu og hlaupið samtals 54,7 kílómetra í leikjunum fjórum.

Það gerir 13,7 km í leik sem er í raun mögnuð tölfræði. Hann hljóp í heildina 19 km þegar liðið var með boltann og 21,2 km þegar liðið var ekki með boltann.

Sílemaðurinn Marcelo Diaz er í öðru sæti, en hann hljóp 52,2 km á mótinu sem jafngildir 13 km í leik. Hann hljóp 20,2 km þegar liðið var með boltann en 17,7 án hans.

Jermaine Jones, hinn þýskættaði miðjumaður Bandaríkjanna, er í þriðja sæti, nokkuð langt á eftir efstu mönnum. Hann hljóp 47,6 km á mótinu en samtals hlupu hann og Bradley 102,2 kílómetra á HM.

Þessir þrír koma ekki meira við sögu á HM í Brasilíu, ekkert frekar en næstu menn; GökhanInler í liði Sviss og Sílemaðurinn CharlesAranguiz.

Í næstu þremur sætum á eftir þeim koma Þjóðverjarnir PhilippLahm, ToniKroos og Thomas Müller sem allir eiga eftir að spila a.m.k. einn leik til viðbótar.

Hér má sjá heildartölfræðina yfir þá sem hlaupið hafa mest inn á vellinum á HM til þessa.