Witsel: HM misheppnað ef við töpum gegn Bandaríkjunum

Bandaríkin og Belgía mætast klukkan 20.00 í kvöld í síðasta leik 16 liða úrslitanna á HM í fótbolta.

Belgar eru taldir sigurstranglegri þó þeir verði án leikmanna eins og ThomasVermaelens, Anthonys Vanden Borre og mögulega Vincents Kompanys vegna meiðsla.

Hjá belgíska liðinu kemur ekkert annað til greina en að fara í átta liða úrslitin enda hæfileikarnir í liðinu gríðarlegir.

„Það er á hreinu að þetta mót er misheppnað hjá okkur ef við töpum gegn Bandaríkjunum og við komumst ekki í átta liða úrslitin. Við erum með frábært lið, frábæra leikmenn og nógu mikil gæði til þess að komast áfram. Ég verð mjög svekktur ef við föllum úr keppni,“ segir Axel Witsel, miðjumaður Belgíu.

Eden Hazard, leikmaður Chelsea, hefur verið gagnrýndur fyrir frammistöðu sína á mótinu, en meira að segja MarcWilmots, þjálfari liðsins, hefur opinberlega sagt að hann vilji frá meira frá honum.

„Við treystum allir á Eden. Það vita allir hversu frábær hann er. Hann vill skipta sköpum og ég er viss um að við munum sjá það besta frá honum,“ segir Axel Witsel.