Öruggt hjá Chelsea

Chelsea lagði Leicester City 2-0 í ensku úrvalsdeildinni í fótbolta í dag á heimavelli sínum í London. Markalaust var í hálfleik.

Diego Costa kom Chelsea yfir á 63. mínútu eftir þunga sókn heimamanna. Costa er því búinn að skora í báðum deildarleikjum sínum fyrir Chelsea eftir að hann kom frá Atletico Madrid í sumar.

Skömmu áður fékk Leicester sitt besta færi í leiknum en Eden Hazard gerði út um leikinn þrettán mínútum fyrir leikslok eftir sendingu Cesc Fabregas. Fabregas hefur lagt upp þrjú mörk í tveimur fyrstu deildarleikjum fyrir liðið.

Chelsea er með fullt hús stiga eftir tvo leiki en Leicester er eitt stig úr tveimur fyrstu leikjunum.