Þriðjungur leikmanna ensku úrvalsdeildarinnar er frá Englandi

Enskir leikmenn fá fleiri mínútur í ensku úrvalsdeildinni í fótbolta á fyrstu mánuðum nýs tímabils en á síðustu leiktíð.

Þetta kemur fram í ítarlegri rannsókn State of the Game sem gerð var fyrir BBC og má lesa í heild sinni hér.

Af heildartíma allra leikjanna í úrvalsdeildinni á síðustu leiktíð spiluðu enskir leikmenn 32,36 prósent mínútanna, en sú tala hefur hækkað upp í 36,08 prósent frá byrjun ágúst til 1. október á nýrri leiktíð.

Þessa aukningu má nánast alfarið þakka nýliðum Burnley sem hafa aðeins notað einn leikmann utan Englands það sem af er. Fyrir utan Burnley fá Englendingar fá tækifæri í úrvalsdeildinni, að því fram kemur í frétt BBC.

Þessi skýrsla kemur út aðeins hálfu ári eftir að Grek Dyke, formaður enska knattspyrnusambandsins, gaf út áætlun um að gefa enskum leikmönnum fleiri tækifæri í úrvalsdeildinni með það að markmiði að vinna HM í Katar 2022.

Fram kemur í skýrslunni að Arsenal, Chelsea, Manchester United, Tottenham og meistarar Manchester City noti flesta leikmenn utan Englands í deildinni.

Argentínumönnum hefur fjölgað mikið í úrvalsdeildinni, en þeir eru nú í þriðja sæti á eftir Frökkum og Spánverjum. Það eru fleiri Argentínumenn í ensku úrvalsdeildinni en walesverjar.

Á síðustu leiktíð spiluðu 44 nýir leikmenn fyrir átta efstu lið ensku úrvalsdeildarinnar og 33 þeirra voru erlendir leikmenn. Fjórðungur þeirra 373 þriggja erlendu leikmanna sem spiluðu í ensku úrvalsdeildinni á síðasta tímabili spiluðu færri en tíu leiki.

Burnley hefur notað flesta enska leikmenn hingað eða þrettán talsins. Chelsea, Stoke og Manchester City hafa aðeins notað þrjá Englendinga.

Á síðustu leiktíð spiluðu aðeins fimm Englendingar alla leikina 38 í ensku úrvalsdeildinni