Samkomulag náðist ekki

Frestur til að ná samkomulagi um kjarnorkuáætlun Írana hefur verið framlengdur til loka júnímánaðar á næsta ári eftir að mistókst að ná heildarsamkomulagi um málið í Vínarborg í dag

Stórveldi á borð við Bandaríkin, Rússland, Kína og Þýskaland vilja að Íranir hætti kjarnorkutilraunum sínum alfarið og að í staðinn verði viðskiptabanni sem sett var á landið aflétt.

Íranir halda hinsvegar fast í þá afstöðu sína að kjarnorkuáætlunin sé aðeins í friðsömum tilgangi og að ekki standi til að framleiða kjarnavopn. Endanleg niðurstaða fékkst ekki eftir fundarlotu í Vínarborg undanfarna daga en viðræður halda áfram í desember.

Tólf ára drengur lést í gær eftir skotsár sem hann hlaut af hendi löreglumanns í Cleveland borg í Ohio á laugardag. Drengurinn hafði verið að leika sér á leikvelli með dótabyssu og ekki hlýtt fyrirmælum lögreglunnar um að setja hendur upp í loft. Rannsókn er hafin á málinu og hafa lögreglumennirnir verið sendir í leyfi.

Þetta er ekki í fyrsta sinn sem vinnubrögð lögreglunnar í Cleveland eru rannsökuð en árið 2012 endaði bílaeltingaleikur með dauða tveggja manna, en á meðan honum stóð skutu lögreglumenn alls 137 skotum af byssum sínum.

Að minnsta kosti fimmtíu manns eru látnir og fleiri tugir særðir eftir að sjálfsvígssprengjumaður sprengdi sjálfan sig í loft upp innan um áhorfendur á fjölmennum blakleik í austurhluta Afganistans í gær.

Ungmennamót stóð yfir á vellinum milli þriggja félaga í Paktika-héraði þegar árásin var gerð og tæplega helmingur látinna börn á aldrinum átta til fjórtán ára.