Leið pínu eins og gengi Man. Utd væri allt mér að kenna

Belganum Marouane Fellaini leið ekki vel hjá Man. Utd og segist hafa upplifað að gengi liðsins hafi verið svolítið mikið honum að kenna.

Fellaini segir að stuðningur fjölskyldunnar og fín spilamennska með Belgíu hafi haldið honum á floti á erfiðum tímum.

Belginn skoraði ekki mark í fyrra og sýndi lítið inn á vellinum sem þótti eðlilega ekki boðlegt fyrir mann sem kostaði tæpar 30 milljónir punda.

Kappinn hefur verið á uppleið undir stjórn Louis van Gaal og staðið vaktina vel í síðustu leikjum.

„Mér leið pínu eins og mér væri kennt um gengi liðsins í fyrra. Ég missti samt aldrei trúna á sjálfan mig og það er nauðsynlegt í fótbolta að hafa mikinn andlegan styrk. Ég hef það sem betur fer," sagði Fellaini.

„Fjölskyldan hjálpaði mér í gegnum þetta mótlæti. Ég fór svo á HM þar sem gekk vel hjá mér. Það var mjög mikilvægt fyrir sjálfstraustið og ég mætti á æfingar fullur sjálfstrausts eftir sumarið."