Barkley vill ekki að menn líki honum við Rooney

Ross Barkley er einn allra efnilegasti knattspyrnumaður Englendinga og hefur verið líkt við Wayne Rooney. Hann sjálfur er þó ekki hrifinn af því.

Barkley er kominn aftur inn í enska landsliðið eftir meiðsli og er í hópnum fyrir komandi leiki á móti Slóveníu og Skotlandi. Barkley er tvítugur og níu árum yngri en Wayne Rooney, fyrirliði enska landsliðsins.

„Ég sé mig bara sem mig. Það er samt alveg eðlilegt að menn líki mér við Wayne Rooney enda komum við báðir upp í gegnum unglingastarf Everton. Ég er samt ekki hrifinn af þessum samanburði," sagði Ross Barkley við BBC.

„Wayne er búinn að hjálpa mér mikið og hann kom strax til mín þegar ég kom fyrst inn í landsliðið. Ég er mjög þakklátur fyrir það. Allt síðan að ég var ungur hef ég viljað afreka það sem Wayne er búinn að gera. Hann verður einn af allra bestu knattspyrnumönnunum sem England hefur alið," sagði Barkley en næsti landsleikur Wayne Rooney verður númer 100.

Ross Barkley skrifaði undir nýjan fjögurra ára samning við Everton í júlí en meiddist síðan í upphafi tímabilsins.