Van Gaal: Seinna gula spjald Smalling heimskulegt

Louis van Gaal, stjóri Manchester United, segir að seinna gula spjald Chris Smalling hafi verið afar heimskulegt. Hann var ekki sáttur með Smalling og sagði að hann þyrfti að passa sig.

„Í nágrannaleikjum þarftu að vera varkár. Seinna gula spjaldið var afar heimskulegt," sagði Hollendingurinn í leikslok.

„Ég sá ekki fyrra gula spjaldið, en dómarinn gaf það. Þegar þú ert á gulu spjaldi verðuru að passa þig og stundum ræðuru ekki við tilfinningar þínar, en þetta var ekki mjög gáfulegt."

United er eftir leikinn í níunda sæti deildarinnar með þrettán stig, en einnig eru þeir í miklum vandræðum varnarlega. Rafael er meiddur, Marcus Rojo fór úr axlarlið í leiknum í dag og Smalling er á leið í leikbann.