Agüero: Ég er viss um að Chelsea tapar stigum

Sergio Agüero var hetja Manchester City um helgina þegar hann skoraði sigurmark liðsins í Manchester-slagnum á móti Manchester United. City er samt sex stigum á eftir toppliði Chelsea.

Sergio Agüero skoraði eina mark leiksins á 63. mínútu eins og sjá má hér fyrir neðan en þetta var tíunda deildarmark Kun Agüero á tímabilinu og er hann nú markahæstur í deildinni.

Agüero er búinn að vinna upp forskot Diego Costa (9 mörk) á markalistanum og hann trúir því að City-liðið getið unnið upp forskot Chelsea sem er búið að ná í 26 stig af 30 mögulegum í fyrstu tíu umferðunum.

„Það var mjög mikilvægt að vinna þennan leik. Chelsea-liðið er að gera mjög góða hluti og þeir halda áfram að vinna sína leiki. Við verðum samt að halda áfram og ég er viss um að Chelsea mun tapa stigum," sagði Sergio Agüero við City TV.

„Þeir mæta Liverpool um næstu helgi og við verðum að sjá hvort þeir tapi stigum þar. Það mikilvægasta hjá okkur er að við vinnum okkar leiki. Það er mikið eftir ennþá," sagði Agüero.

Sjáið sigurmark Aguero.