Carrick ætlar að leysa miðvarðavandræði United

Michael Carrick segist reiðubúinn að spila í vörn Manchester United til að leysa miðvarðavandræði félagsins.

Carrick hafði ekkert spilað á tímabilinu þegar hann kom inn á sem varamaður fyrir Marcos Rojo sem fór úr axlarlið þegar United tapaði fyrir grönnum sínum í City um helgina.

Phil Jones verður einnig frá næstu vikurnar vegna meiðsla og þá hefur Jonny Evans ekkert spilað vegna meiðsla í ökkla. Chris Smalling verður þar að auki í banni þegar United mætir Crystal Palace á laugardaginn.

„Ég mun spila í hvaða stöðu sem er. Ég hef ekki spilað mikið að undanförnu og er sáttur við hvað sem er,“ sagði Carrick í samtali við enska fjölmiðla en hann meiddist illa á ökkla á undirbúningstímabilinu.

„Ég hef áður spilað í þessari stöðu þó svo að leikirnir séu ekki mjög margir. En mér er alveg sama - ég get spilað hvar sem er.“

Í fyrstu var óttast að Rojo yrði frá í nokkra mánuði en forráðamenn United eru vongóðir er að hann muni aðeins missa af 2-3 leikjum.