Messan: Ekkert lið þorir að sækja á mörgum mönnum gegn City

Strákarnir í Messunni fóru vel og vandlega yfir varnarleik beggja liða í stórslag Manchester-liðanna í ensku úrvalsdeildinni um helgina.

Leiknum lyktaði með 1-0 sigri City en engu að síður sagði Ríkharður Daðason að United hafi komist vel frá sínum varnarleik.

„Þegar United var ekki með boltann stilltu þeir upp í 4-5-1. Það var skynsamleg uppsetning miðað við hvernig varnarleikur United hefur verið til þessa á tímabilinu,“ sagði Ríkharður þrátt fyrir að afleiðingin hafi verið sú að Angel di Maria hafi ekki nýst jafn vel í sóknarleiknum og áður.

„Hún virkaði fyrir utan nokkur færi og liðið varðist ágætlega. Það var kraftur í leikmönnum og þeir voru inni í leiknum þangað til að rauða spjaldið [á Chris Smalling] kom.“

Ríkharður segir að City hafi byrjað strax í upphafi leiks að setja mikla pressu á varnarlínu United. „En svo duttu þeir í sitt klassíska 4-4-2 og það eru ekki mörg lið í ensku deildinni sem ráða við að spila með tvo miðjumenn. En þetta lið gerir það rosalega vel.“

„Kannski er það vegna þess að það er svo hættulegt þegar það vinnur boltann að ekkert lið þorir að sækja á mörgum mönnum gegn þeim,“ segir hann en innslagið má sjá í heild sinni hér fyrir ofan.