Lögmaður Man. United hjálpar Solskjær í deilunni við Cardiff

Það hefur ekki heyrst mikið frá Norðmanninum Ole Gunnar Solskjær síðan að hann hætti sem knattspyrnustjóri velska félagsins Cardiff City um miðjan september.

Hvorki Ole Gunnar Solskjær eða eigandinn Vincent Tan hafa gefið færi á viðtali um endalok Norðmannsins en nú er í gær kom fram í norskum fjölmiðlum að báðir aðilar hafa staðið í deilum á bak við tjöldin undanfarnar sex vikur.

Solskjær vill fá bætur fyrir töpuð laun út þetta tímabil og sú upphæð gæti verið meira 500 milljónir íslenskra króna samkvæmt heimildum norskra fjölmiðla.

Það gekk ekki vel í stjóratíð Ole Gunnar Solskjær hjá Cardiff en liðið féll úr ensku úrvalsdeildinni og byrjaði síðan illa í ensku b-deildinni.

Ole Gunnar Solskjær hefur öflugan mann í sínu horni og það gæti komið sér vel ef málið endar fyrir dómi. Hans lögmaður er Matthew Bennett sem sérhæfir sig í málum tengdum íþróttum og hefur starfað fyrir mörg félög og þar á meðal fyrir Manchester United. Bennett staðfesti það við Dagbladet að hann væri lögmaður Solskjær.

Solskjær naut aðstoðar Matthew Bennett þegar hann samdi við Cardiff City á sínum tíma og Bennett ætti því að vera með það á hreinu hvar Cardiff er ekki að standa við sitt.