West Ham átti besta stjórann og besta leikmanninn í október

Sam Allardyce, knattspyrnustjóri West Ham og framherjinn Diafra Sakho, þóttu bestir í ensku úrvalsdeildinni í októbermánuði að mati sérstakrar valnefndar deildarinnar.

West Ham liðið vann alla þrjá leiki sína í mánuðinum á móti Queens Park Rangers, Burnley og meisturum Manchester City. Diafra Sakho skoraði í öllum þremur sigrunum og West Ham hoppaði upp í fjórða sæti deildarinnar.

Sam Allardyce keypti Diafra Sakho til Lundúnaliðsins og það voru frábær kaup en Senegalinn hefur skorað sex mörk í fyrstu sjö leikjum sínum í ensku úrvalsdeildinni.

Þetta er í sjötta sinn sem Sam Allardyce er valinn besti stjóri mánaðarins og hann er þar kominn í efsta sætið við hlið þeirra Sir Bobby Robson og Rafael Benitez. Allardyce fékk verðlaunin einnig í febrúar 2014 en West Ham vann þá alla fjóra leiki sína.

Sam Allardyce hélt einnig upp á sextugsafmælið sitt í mánuðinum og þetta var því súper mánuður fyrir Stóra Sam.

Diafra Sakho varð fjórði leikmaður West Ham til þess að hljóta þessi verðlaun og komst þar í hóp með þeim Stuart Pearce (febrúar 2001), Anton Ferdinand (janúar 2006) og Scott Parker (febrúar 2011).