Van Persie: Ferguson sagðist ætla að vera áfram

Robin van Persie segir að Sir Alex Ferguson hafi tjáð honum að hann yrði áfram við stjórnvölinn hjá Manchester United næstu þrjú árin, innan við ári áður en hann steig frá borði eftir 26 ára starf hjá félaginu.

Rio Ferdinand, fyrrverandi leikmaður United, greindi nýverið frá því að brotthvarf Ferguson hafði fengið hvað mest á Hollendinginn sem kom frá Arsenal sumarið 2012. Van Persie staðfesti þetta í samtali við hollenska fjölmiðla.

„Rio er frábær náungi. Hann talar mikið en það er sannleikskorn í því sem hann sagði.

„Ég kom til United að hluta til vegna Ferguson -  eða Sir Alex - og hann sagði mér að hann myndi stýra liðinu næstu þrjú árin. Ég var hrifinn af hans nálgun.

„Á einum tímapunkti vorum við 18 stigum á undan Manchester City, en töpuðum heima fyrir þeim, 2-1. Við vorum samt enn með 15 stiga forystu, en Sir Alex var brjálaður. Þá rann það upp fyrir mér: hann er sigurvegari,“ sagði van Persie sem bætti við hann þyrfti að spila betur en hann hefur gert til þessa á leiktíðinni.

Manchester United tekur á móti Crystal Palace í ensku úrvalsdeildinni klukkan 15:00 í dag. Leikurinn verður sýndur í beinni útsendingu á Stöð 2 Sport 2.