Jón Gnarr flytur til Houston

Jón Gnarr ætlar að flytja ásamt fjölskyldu sinni til Houston í Texas á nýju ári. Fjölskyldan hefur fundið sér íbúð á góðum stað í borginni að sögn Jóns Gnarr og níu ára gamall sonur hans mun ganga í grunnskóla sem ber nafnið Edgar Allen Poe Elementary School.

„Ég held að þetta gæti verið upphafið að einhverju mjög athyglisverðu ævintýri,“ segir Jón Gnarr á Facebook.

Click here for an English version.

Óvíst hefur verið hvað borgarstjórinn fyrrverandi ætlaði að taka sér fyrir hendur í kjölfar þess að kjörtímabili hans sem borgarstjóri í Reykjavík lauk í júní. Jón var í Austin í Texas í ágúst þar sem hann tók þátt í Out Of Bound grínhátíðinni. Nú er óhætt að segja að hann sé að taka öllu stærra skref í átt til suðurríkisins.

Jón greindi frá því í viðtali við Vice í maí að hann hefði það á tilfinningunni að hann væri á leiðinni til Texas.

„Fólk segir að það trúi ekki á tilviljanir. Ég geri það. Ég trúi ekki á guð en það er eitthvað við tilviljanir. Ég er heillaður af þeim. Ég er ekki viss hvort ég hafi sjálfstæðan vilja og ég er heldur ekki viss hvort heilinn minn sé búinn að taka ákvörðun um næsta skref. En ég hef skrýtna tilfinningu, sem er fáránlegt, að heilinn á mér ætli að senda mig til Texas. Ég hef aldrei komið þangað. Texas er svipað og Mordor í huga mér, eða eitthvað svoleiðis,“ sagði Jón í viðtalinu aðspurður hvað tæki við að loknu kjörtímabilinu.

Þá hefur Jón endurtekið verið spurður að því hvort hann gæti hugsað sér að bjóða sig fram til embættis forseta Íslands. Hann hefur aldrei svarað þeirri spurningu neitandi.

Jón greinir ekki frá því hver tilgangurinn með flutningunum sé. Á útgáfusíðu í Dallas er greint frá því að Jóni hafi verið boðin „Artist-in-Residence“ staða við Rice háskólann í Houston frá 14. janúar.