Bróðir Rob Ford tekur slaginn í hans stað

Rob Ford, borgarstjóri Toronto í Kanada, er hættur við að sækjast eftir endurkjöri og hefur ákveðið að draga framboð sitt til baka.

Ford komst enn einu sinni í fjölmiðla um allan heim í vikunni þegar hann var lagður inn á spítala eftir að hafa gengist undir ýmsar rannsóknir sem bentu til þess að hann væri með æxli í maga.

Ford á að hafa kvartað undan verkjum undanfarna mánuði en hann hefur verið tíður gestur í fjölmiðlum um allan heima að undanförnu vegna áfengis- og fíkniefnaneyslu sinnar.

Bróðir borgarstjórans í Toronto, Doug Ford, hefur ákveðið að bjóða sig fram í hans stað.

Borgarstjórnin í Toronto í Kanada ákvað í nóvember að svipta borgarstjórann nær öllum völdum.

Ford hefur verið mikið í sviðsljósinu en hann hefur meðal annars viðurkennt að hafa reykt krakk í borgarstjóratíð sinni auk þess sem myndband birtist af honum á sínum tíma þar sem hann hótar manni kvalarfullum dauðdaga.

Ford hafði áður gefið það út að hann ætlaði sér að ná endurkjöri í borgarstjórnarkosningum í október.