Hótar að sprengja ráðhúsið í Toronto ef Rob Ford hypjar sig ekki

Hinn litríki og afar umdeildi borgarstjóri Toronto borgar í Kanada, Rob Ford, segir að sér hafi í gær borist hótun í tölvupósti. Þar mun hafa verið fullyrt að ráðhús borgarinnar yrði sprengt í loft upp, ef hann segði ekki af sér innan sólarhrings.

Ford snéri aftur til vinnu sinnar í byrjun júlí eftir tveggja mánaða afvötnun en hann hefur viðurkennt að hafa reykt krakk og neytt annarra eiturlyfja í borgarstjóratíð sinni. Ford hafði ekki fyrir því að hringja í lögregluna vegna hótunarinnar heldur greindi hann fjölmiðlum fyrst frá henni.

Lögreglan kom svo á staðinn og eftir ítarlega leit í ráðhúsinu fannst engin sprengja.