Vilja halda aftur af Rússum án þess að egna þá

Verkefni leiðtoga NATO, þegar þeir koma saman í Wales á morgun, verður að vernda mikilvæga meðlimi bandalagsins í Austur-Evrópu gegn Rússum. Án þess þó að ergja Rússa um of. NATO hefur reynt að fá Rússland til að ganga í bandalagið í tvo áratugi, en nú virðist sem samband NATO og Rússlands hafi ekki verið verra frá tímum Kalda stríðsins.

Fjallað er um samskipti NATO og Rússlands í grein sem AP fréttaveitan birti í morgun.

NATO tilkynnti á mánudaginn að til stæði að stofna herdeild sem ætlað væri að bregðast við ógnum í Austur-Evrópu á 48 klukkutímum. Að safna ætti birgðum, eins og eldsneyti og skotfærum í löndum eins og Póllandi, en Pólverjar hafa lengi beðið um aukna vernd NATO.

Háttsettur meðlimur rússneska hersins tilkynnti svo í gær að Rússland myndi endurskoða viðbragðsáætlanir sínar með tilliti til „breyttra hernaðarógna“.

Vesturveldin hafa nú í nokkra mánuði sakað Rússa um að styðja við bakið á aðskilnaðarsinnum í Austur-Úkraínu, eftir að Rússlandi hernam og innlimaði Krímskaga. Þrátt fyrir neitanir yfirvalda í Moskvu telur NATO að minnst þúsund rússneskir hermenn taki beinan þátt í átökunum í Úkraíniu og að þeir hafi hjálpað aðskilnaðarsinnum við að snúa taflinu við gegn stjórnarhernum.

Æðsti herforingi NATO í Evrópu sagði í viðtali við þýskt dagblað í síðasta mánuði að ef Rússland myndi beita svipuðum aðferðum í aðildarríki NATO, og nefndi hann Lettland sem dæmi þar sem um 27 prósent íbúa telja sig vera Rússa. Þá væru litið á það sem árás á öll aðildarríki bandalagsins samkvæmt fimmtu grein stofnsamnings NATO frá 1949.

Þannig séu Bandaríkin til dæmis skuldbundin til að vernda Riga, alveg eins og Berlín.

Telja vörn NATO ekki nægjanlega

Þá bendir AP á skýrslu sem varnarmálanefnd neðri deildar breska þingsins birti í júlí. Þar segir að NATO sé sérstaklega óundirbúið fyrir þeirri nýju tegund hernaðar sem Rússar hafa breytt í Úkraínu. Þar sem ýtt sé undir óöld innan annarra landa. Með áróðri, samfélagsmiðlum og notkun hermanna í dulargervi eða án nokkurra merkinga.

Háttsettur embættismaður innan NATO sagði AP að viðbrögð gegn álíka aðgerðum Rússa og þeir hafi beitt í Úkraínu, sé meðal þess sem rætt verði í Wales á morgun.

Þrátt fyrir að leiðtogar bandalagsins hafi undanfarið lofað meðlimum í Austur-Evrópu aukinni vernd, segir AP að þeir vilji ekki skaprauna Vladimir Putin og hershöfðingjum Rússlands. Líkurnar á því að þessar þjóðir fái þá vernd sem þeir hafa beðið um eru ekki miklar.

Viðmælandi AP, Jorge Benitez sem er sérfræðingur í málefnum NATO, segir að ekki muni koma til þess aftur að vesturveldin staðsetji hundruði þúsundir hermanna og skriðdreka í löndunum eins og gert var í Vestur-Þýskalandi á tímum Kalda stríðsins.

Þó stæði til að fjölga heræfingum í löndunum, en NAO meðlimum í Austur-Evrópu þætti það ekki nóg.