Obama í heimsókn til Eystrasalts

Barack Obama Bandaríkjaforseti kom til Eistlands í nótt þar sem hann mun ræða ástandið í Úkraínu og í austur Evrópu almennt við leiðtoga Eistlands, Lettlands og Litháens.

Stjórnvöld í löndunum þremur, sem gengu í Nató árið 2004, eru sögð hafa miklar áhyggjur af framferði Rússa í Úkraínu. Óttast sumir landsmenn að sú ólga sem upp hefur komið hjá rússneskumælandi Úkraínumönnum komi einnig upp í Eistrasaltsríkjunum en þar eru stórir hópar landsmanna af rússnesku bergi brotnir.

Á meðal þess sem rætt verður á fundinum eru áform um að koma upp sérstakri herdeild á vegum Nató í austur Evrópu sem hægt væri að beita með skömmum fyrirvara gegn yfirstandandi ógn. Engum dylst að þar er átt við árás frá Rússum en búist er við að áformin verði samþykkt á leiðtogafundi Nató í Wales sem fram fer síðar í vikunni.