Ferna hjá Sanogo

Alexis Sanchez lék sinn fyrsta leik fyrir Arsenal þegar liðið vann 5-1 stórsigur á Benfica á Emirates Cup í dag. Chile-maðurinn kom inn á sem varamaður á 75. mínútu.

Hann var þó ekki í aðalhlutverki í dag, heldur franski framherjinn Yaya Sanogo sem skoraði fernu fyrir Arsenal í leiknum.

Sanogo kom Lundúnaliðinu yfir á 26. mínútu og Joel Campell bætti svo við marki á þeirri 40.

Sanogo skoraði svo tvö mörk á tveimur mínútum undir lok fyrri hálfleiks og staðan því 4-0 í leikhléi.

Frakkinn fullkomnaði fernuna á 49. mínútu, en Argentínumanninum Nicolas Gaitan tókst að minnka muninn áður en yfir lauk.

Byrjunarlið Arsenal var svoleiðis skipað:

Damian Martinez; Calum Chambers, Hector Bellerin, Nacho Monreal, Kieran Gibbs; Mathieu Flamini, Aaron Ramsey; Joel Campbell, Tomas Rosicky, Alex Oxlade-Chamberlain; Yaya Sanogo.

Mikel Arteta, Alexis Sanchez, Jack Wilshere, Santi Cazorla, Chuba Akpom, Ignasi Miquel og Francis Coquelin komu inn á sem varamenn í seinni hálfleik.

Valencia og Monaco gerðu 2-2 jafntefli í fyrri leik dagsins á mótinu.

Frakkarnir komust yfir með sjálfsmarki Ruben Vezo, en sjálfsmark Ricardo Carvahlo þýddi að staðan var jöfn þegar liðin gengu til búningsherbergja.

Paco Alcacer kom spænska liðinu svo yfir á 69. mínútu, en Lucas Ocampos tryggði Monaco stig þegar hann jafnaði metin á 80. mínútu.

Kólumbíumaðurinn Falcao, leikmaður Monaco, lék sinn fyrsta leik í langan tíma eftir erfið meiðsli. Hann kom inn á sem varamaður fyrir Dimitar Berbatov á 72. mínútu.