Fer frá föður sínum í faðm Guð­jóns Vals: „Þetta er risa­stórt“

Frá þessu er greint á samfélagsmiðlareikningum Gummersbach í dag en þar með mun níu ára veru Dujshebaev hjá pólska stórliðinu Kielce líða undir lok en þar hefur hann spilað undir stjórn föður síns Talant Dujshebaev. 

Alex er 33 ára gamall, gífurlega reynslumikill og hefur raðað inn verðlaunum bæði með Kielce sem og spænska landsliðinu. 

Sex sinnum varð hann pólskur meistari og í þrígang pólskur bikarmeistari en fyrir tíma sinn hjá Kielce vann hann Meistaradeild Evrópu með Vardar frá N-Makedóníu og raðaði einnig inn lands- og bikarmeistaratitlum þar.

Þá hefur hann unnið til verðlauna með spænska landsliðinu á Evrópu- og heimsmeistaramótum sem og á Ólympíuleikunum. Í tvígang hefur hann orðið Evrópumeistari með Spánverjum. 

Þrátt fyrir að atvinnumannaferill Alex spanni fjöldamörg ár er þetta í fyrsta sinn sem hann mun spila í þýsku úrvalsdeildinni. Hann segir samtöl sín við Guðjón Val spila lykilþátt í því að hann taki skrefið til Gummersbach. 

„Ég er mjög stoltur af því að ganga til liðs við félag af þessari stærðargráðu og verða hluti af metnaðarfullu verkefni hjá liði í þýsku úrvalsdeildinni. Samtöl mín við Guðjón Val og Christoph Schindler (yfirmann íþróttamála) eiga lykilþátt í ákvörðun minni. Ég er reiðubúinn til að gefa allt mitt í verkefnið svo við getum náð okkar markmiðum saman.“

Og ánægjan leynir sér ekki hjá þjálfaranum Guðjóni Val með komu Dujshebaev.

„Þýska úrvalsdeildin getur látið sig hlakka til fyrir komu hans,“ segir Guðjón Valur í fréttatilkynningu Gummersbach. „Þetta er risastórt fyrir okkur, stuðningsmenn okkar og svæðið í heild sinni. Við erum stolt og glöð yfir því að hafa tryggt okkur þjónustu Alex eftir frábærar viðræður við hann.“

Gummersbach er sem stendur í 6.sæti þýsku úrvalsdeildarinnar þegar nítján umferðir hafa verið leiknar og er enn í baráttunni um Evrópusæti.