Webb leggur flautuna á hilluna

Howard Webb verður ekki á flautunni í ensku úrvalsdeildinni í vetur, en hann er hættur að dæma. Hann hefur nú störf sem tæknilegur ráðgjafi hjá Professional Game Match Officials Limited, samtökum atvinnudómara á Englandi.

Webb, sem er 43 ára gamall, er af flestum talinn besti enski dómarinn frá upphafi, en árið 2010 varð hann fyrsti maðurinn til að dæma bæði úrslitaleik Meistaradeildarinnar og úrslitaleik HM.

„Ég er mjög ánægður að hefja nýjan kafla í lífi mínu eftir 25 gefandi ár á vellinum. Ég hef verið svo heppinn að vera í besta sætinu í úrvalsdeildinni í tíu ár og fengið að starfa á níu stórmótum,“ segir Webb í yfirlýsingu samtakanna.

Hjá PGMOL mun Webb vinna með yngri dómurum með það að leiðarljósi að styrkja dómgæslu á Englandi. Nýtt afreksverkefni samtakanna felur það í sér að dómara á þriðja stig komast í sérstakan hóp sem Webb um meðal annars sjá um.

Webb dæmdi yfir 500 leiki í úrvalsdeildinni og ensku B-deildinni. Hann dæmdi alla úrslitaleiki enska bolans a.m.k. einu sinni og var bæði á HM 2010 og HM 2014. Hann var aðlaður árið 2011 fyrir framlag sitt til breskrar knattspyrnu.