Í fangelsi fyrir að beina leysigeisla í átt að þyrlu

Á mánudaginn fékk maður frá Bandaríkjunum eins árs og níu mánaða fangelsisdóm fyrir að beina leysigeisla í átt að lögregluþyrlu árið 2013.

Maðurinn, sem heitir Brett Lee Scott og er 26 ára, beindi leysigeisla á lögregluþyrluna í nokkur mismunandi skipti yfir sex mánaða tímabil og notaði tvo mismunandi leysibenda. Hann sagði fyrir dómi að hann hefði gert þetta því honum hafi leiðst og vildi stytta sér stundir.

Notkun leysibenda í þessum tilgangi er litin alvarlegum augum í Bandaríkjunum. „Það er ekki heil brú í því að fremja svona glæp. Þetta er mjög alvarlegt mál," segir Benjamin Wagner saksóknari í Kaliforníu. Hann bætir við: Menn eins og Scott sem nota leysibenda í þessum tilgangi fyrir eitthvað stundargaman geta skapað mikla hættu. Þarna hefði getað orðið alvarlegt slys."

Þyngsti dómurinn í svona málum var kveðinn upp í mars þegar maður fékk fjórtán ára fangelsisdóm fyrir að beina leysigeisla að sjúkraþyrlu sem flaug með veikt barn á barnaspítala.

Alls hafa áttatíu dómar verið kveðnir upp í Bandaríkjunum í málum þar sem fólk beinir leysigeislum að flugvélum og þyrlum.