Arsenal samþykkir tilboð Barcelona í Vermaelen

Samkvæmt heimildum BBC hefur Arsenal samþykkt tilboð frá Barcelona í belgíska miðvörðinn Thomas Vermaelen. Vermaelen hefur verið orðaður við Manchester United undanfarnar vikur en svo virðist sem hann sé á förum til spænska stórveldisins.

Vermaelen sem er fyrirliði Arsenal gekk til liðs við félagið árið 2009 frá hollenska liðinu Ajax og fór afar vel á stað með Skyttunum. Hann þurfti þó að sætta sig við mikla bekkjarsetu á síðasta tímabil.

Samkvæmt heimildum BBC hefur Arsenal samþykkt tilboð upp á 15 milljónir punda frá Barcelona í von um að hann fari frekar til Barcelona en Manchester United.

Vermaelen mun ferðast til Barcelona í dag til þess að semja við félagið og gangast undir læknisskoðun áður en félagsskiptin ganga í gegn.

Barcelona virðist ætla að leggja áherslu á varnarleikinn í vetur en félagið hefur þegar gengið frá kaupunum á franska varnarmanninum Jeremy Mathieu frá Valencia.