Segja ofsóknir IS í Írak orðnar að þjóðarmorði

Kristnir prestar í Írak og Sýrlandi segja að ofsóknir IS samtakanna, Íslamska ríkisins, gegn minnihlutahópum séu orðnar að þjóðarmorði. Tugir þúsundir kristinna og annarra minnihlutahópa í norðurhluta Írak hafa þegar flúið heimili sín undan sókn IS.

Biskupinn Athanasius Toma Dawod segir Guardian að hernám IS á borginnin Qaragosh, hafi markað ákveðin tímamót fyrir kristið fólk í landinu. Frá innrás Bandaríkjanna í Írak árið 2003 hefur kristinn minnihluti í landinu orðið fyrir auknum ofsóknum.

„Nú köllum við það þjóðarmorð. Þjóðernishreinsun. Þeir eru að myrða okkar fólk í nafni Allah," segir Dawod við Guardian. Þá segir hann IS hafa það fyrir fólki að með því að drepa kristið fólk eigi það greiða leið að himnaríki.

„Þeir hafa brennt kirkjur og mjög gamlar bækur. Þeir hafa skemmt krossa og styttur af Maríu mey.“ Við þetta bætir hann að IS breyti einnig kirkjum í moskur.

Louis Sako, leiðtogi kaþólikka í Írak segir að um hundrað þúsund kristinna vera á flótta og biður Evrópusambandið og Bretland um að koma þeim til aðstoðar áður en það yrði of seint. Flestir sem eru á flótta hafa sett stefnuna á Irbil, höfuðborg sjálfstjórnarsvæðis Kúrda.

Fyrr í mánuðinum flúði mikill fjöldi fólks sem tilheyrir minnihlutahópnum Jasídar, þegar IS hertók bæinn Sinjar upp nærliggjandi fjallgarð. AP fréttaveitan segir vígamenn hafa tekið hundruð ungra kvenna höndum. Fjöldi Jasída sitja nú fastir í fjöllunum. Fólkið býr yfir fáum birgðum, en bæði Bretar og Bandaríkjamenn hafa notast við flugvélar til að koma birgðum til þeirra.