Heimsmeistararnir fá hvíld

Arsene Wenger, þjálfari Arsenal, hefur ýjað að því að hann muni hvíla hina nýkrýndu þýsku heimsmeistara, Mesut Özil, Lukas Podolski og Per Mertesacker, í upphafi komandi tímabils.

„Ég þarf að taka ákvörðun; á ég að taka þá strax inn í liðið, láta þá spila og missa þá síðan í október eða nóvember eða á ég að gefa þeim nauðsynlega hvíld og tækifæri til að safna kröftum á ný,“ sagði Wenger og bætti við:

„Ég hef valið seinni kostinn vitandi að það sé áhættusamt, því við eigum eftir að spila í fokeppni Meistaradeildar Evrópu. En það er ekki víst að þeir verði tilbúnir þá.“

Enginn ofantaldra leikmanna snýr aftur til æfinga fyrr en 11. ágúst, aðeins fimm dögum áður en Arsenal mætir Crystal Palace í fyrsta leik sínum í ensku úrvalsdeildinni. Heimsmeistararnir munu því missa af leiknum um Samfélagsskjöldinn þann 10. ágúst.

Wenger, sem stýrði Arsenal til sigurs í ensku bikarkeppninni í vor, segir að tíminn á milli loka HM og upphafs úrvalsdeildarinnar sé of stuttur.

„Það er erfitt að sjá fyrir hvernig leikmenn muni höndla álagið, því tíminn til undirbúnings og hvíldar er of stuttur,“ sagði Wenger, en Arsenal endaði síðasta tímabil í 4. sæti og tryggði sér enn og aftur sæti í Meistaradeildinni.