Telja að hryðjuverk verði framin í Noregi á mánudag

Fréttastofa TV2 í Noregi fullyrðir að hópur ódæðismanna freisti þess að fremja hryðjuverk í landinu mánudaginn næstkomandi. Samkvæmt dagatali múslima markar sá dagur endalok föstumánaðar, eða Ramadan, og er einn mikilvægasti helgidagur Múhameðstrúar.

Talið er að hópur manna hafi farið frá Sýrlandi á dögunum í þeim tilgangi að fremja hryðjuverk í nokkrum vestrænum ríkjum, þar á meðal í Noregi. Gríðarlegur viðbúnaður er í Noregi um þessar mundir, engu að síður liggur ekki fyrir hvert skotmark ódæðismannanna er eða nákvæm tímasetning.

Gunnar Pálsson, sendiherra Íslands í Noregi, segir í viðtali við Fréttablaðið í dag að engin ástæða sé til að vara við ferðum til Noregs. Yfirvöld í Noregi krefja þó alla ferðamenn um vegabréf, þar á meðal ferðalanga frá Íslandi.

Yfirvöld í vesturhluta Noregs hafa bannað flug yfir miðborg Björgvinjar en annars ganga aðrar samgöngur eðlilega fyrir sig.