Lampard gæti elt Villa til Ástralíu

Frank Lampard mun líklega elta spænska markahrókinn David Villa til Ástralíu áður en þeir ganga báðir til liðs við New York City í MLS-deildinni.

Villa er búinn að ganga frá samningi við NY City, en hann mun byrja á því að spila tíu leiki fyrir ástralska liðið Melbourne City.

Englandsmeistarar Manchester City eiga Melbourne-liðið og New York City FC ásamt hafnaboltaliðinu New York Yankees.

Sagt er að Lampard, sem yfirgefur Chelsea í sumar eftir þrettán ár, sé búinn að semja við MLS-liðið sem hann fer til í maí á næsta ári. Það hefur ekki leik í MLS-deildinni fyrr en á næsta ári enda glænýtt félag.

Lampard hefur ekkert gefið út með að hann sé á leið til Ástralíu en Mark Schwarzer, varamarkvörður Chelsea, segir í viðtali við Mirror að Lampard hafi verið að spyrja sig út í Melbourne.

„Það eina sem ég get sagt er að hann spurði mig út í Melbourne Heart [Melbourne City hét áður Heart]. Hann spurði mig hvernig borgin er og hvernig liðið er. Hann veit núna það sem ég veit og ég veit hvernig hann er. Svo sjáum við bara til hvað gerist,“ segir Mark Schwarzer