Rodgers: Lallana er mikill leiðtogi

Brendan Rodgers, knattspyrnustjóri Liverpool, var gríðarlega ánægður þegar kaup Liverpool á Adam Lallana gengu loksins í gegn í morgun.

Lallana er annar leikmaðurinn sem Liverpool kaupir í sumar og hafa þeir báðir komið frá Southampton. Talið er að Liverpool greiði allt að 25 milljónir punda fyrir þjónustu hins 26 ára Lallana sem var fyrirliði Southampton á síðasta tímabili.

„Við erum ánægðir að hafa tryggt okkur einn af hæfileikaríkustu leikmönnum deildarinnar sem hefur einnig óbilandi sigurvilja. Adam er ungur maður sem ætlar sér langt, er mikill leiðtogi og hann passar vel inn í umhverfið hjá Liverpool.“

„Hann gerir sér grein fyrir því að samkeppnin verður gríðarleg um sæti í liðinu en það eigi aðeins eftir að gera hann að betri leikmanni. Ég hef enga trú á öðru en að hann muni slá í gegn hjá félaginu og hlakka ég til að vinna með honum,“

Lallana var í skýjunum þegar hann ræddi við opinbera heimasíðu Liverpool eftir að hafa skrifað undir samning hjá félaginu.

„Ég trúi þessu eiginlega varla og get ekki beðið eftir að tímabilið byrjaði. Ég hef verið í 14 ár hjá Southampton og ég get ekki þakkað þeim nóg en ég er spenntur að hefja næsta kafla ferilsins. Ég er spenntur fyrir tækifærinu að fá að spila í Meistaradeildinni. Ég hef heyrt að það sé ekkert eins og Meistaradeildarkvöld á Anfield,“ sagði Lallana.