Lescott á leið til Hull

Joleon Lescott er nálægt því að ganga frá tveggja ára samningi við enska úrvalsdeildarfélagið Hull City.

Lescott er án félags eftir að samningur hans við Manchester City rann út í sumar en líklegt er að hann fari í læknisskoðun hjá Hull síðar í vikunni.

City greiddi Everton 29 milljónir punda fyrir hann árið 2009 og spilaði hann alls 92 úrvalsdeildarleiki fyrir félagið og skoraði í þeim sjö mörk.

Það hefur þó hallað undan fæti hjá Lescott undanfarin ár og hann bæði misst sæti sitt í byrjunarliði City og í enska landsliðshópnum.

Hann er 31 árs gamall og hefur einnig verið orðaður við önnur félög í Englandi, Þýskalandi og miðausturlöndum.