Aron spilaði og Bandaríkin lögðu Gana

Aron Jóhannsson fagnaði sigri í sínum fyrsta leik á HM í kvöld. Bandaríkin lögðu þá Gana, 2-1, en sigurinn var ekki beint sanngjarn. Aron kom af bekknum á 23. mínútu.

Okkar maður Aron Jóhannsson byrjaði leikinn á bekknum og þeir Clint Dempsey og Jozy Altidore byrjuðu leikinn í fremstu víglínu.

Leikurinn byrjaði með miklum látum því Clint Dempsey kom Bandaríkjamönnum yfir eftir aðeins 32 sekúndur.

Hann fékk sendingu í teiginn og þökk sé hörmulegum varnarleik Ganamanna náði hann að komast í opið skot sem hann kláraði vel. Fimmta fljótasta mark í sögu HM.

Á 23. mínútu meiddist Jozy Altidore er hann tognaði aftan í læri. Í stað hans kom Aron Jóhannsson og varð um leið fyrsti Íslendingurinn til þess að spila á HM.

Ólíklegt er að Altidore jafni sig á þessum meiðslum áður en HM klárast og Aron gæti því vel verið í byrjunarliðinu í næsta leik.

Þrátt fyrir nokkuð fjör tókst liðunum ekki að bæta við mörkum og Bandaríkin leiddu 1-0 í hálfleik.

Ganamenn höfðu gríðarlega yfirburði í síðari hálfleik og sóttu af krafti. Hvað eftir annað komu þeir sér í álitlega stöðu en náðu ekki að skora.

Lítið að frétta í sóknarleik Bandaríkjamanna og Aron takmarkað í boltanum.

Átta mínútum fyrir leikslok tókst Gana loksins að jafna. Frábært spil í teignum og Andre Ayew skorar með laglegu skoti. Fyllilega verðskuldað hjá Gana sem var með yfirburði.

Bandaríkjamenn lögðu ekki árar í bár og John Brooks kom þeim yfir fjórum mínútum fyrir leikslok með skalla eftir hornspyrnu. Skelfilega illa dekkaður og þakkaði pent með því að stanga knöttinn í netið. Það reyndist vera sigurmark leiksins.

Hér má sjá er Aron kemur af bekknum. Söguleg stund. Hér að ofan má sjá fleiri myndir af Aroni í leiknum.