G7 ríkin tilbúin að leggja frekari þvinganir á Rússland

Leiðtogar G7 ríkjahópsins sem nú hittast á fundi í Brussel í Belgíu segjast tilbúnir til þess að leggja frekari viðskiptaþvinganir á Rússa vegna framferðis þeirra í Úkraínu.

Í sameiginlegri yfirlýsingu eru yfirvöld í Moskvu fordæmd fyrir að brjóta ítrekað á fullveldisrétti Úkraínumanna. Þetta er í fyrsta sinn sem leiðtogarnir hittast allir saman eftir að Rússum var gert að yfirgefa hópinn, sem áður gekk undir nafninu G8.

Fundurinn er löngu ákveðinn og í fyrstu átti einmitt að halda hann í Rússlandi, í Ólympíuborgnni Sochi. Ekkert varð af þeim fundi eftir að Rússar innlimuðu Krímskaga fyrr á árinu.

Obama Bandaríkjaforseti er á fundinum en á morgun liggur leið hans til Frakklands þar sem hann mun taka þátt í minningarathöfnum þar sem sjötíu ár eru nú liðin frá því innrásin í Normandý hófst. Vladimír Pútín Rússlandsforseti verður einnig á staðnum, en ekki er talið að þeir muni þó hittast í einrúmi. Pútín mun þó hitta nokkra leiðtoga annarra G7 ríkja í Frakklandi.