Carroll og Nolan vilja hjálpa Liverpool

Síðasta umferð ensku úrvalsdeildarinnar í fótbolta verður leikin í dag og hefst hún klukkan 14. Mesta spennan er á toppi deildarinnar en Liverpool þarf að treysta á West Ham á Etihad leikvanginum.

Fyrrum leikmaður Liverpool, Andy Carroll, mun leiða framlínu West Ham gegn Manchester City í dag og hann vill hjálpa sínu gamla félagi að verða meistari í fyrsta sinn í 24 ár.

„Ég vona að Liverpool vinni deildina og ég mun reyna mitt besta til að skora á Etihad,“ sagði framherjinn við fjölmiðla.

„Ég á marga góða vini hjá félaginu og í hreinskilni sagt þá á Steven Gerrard skilið að vinna titilinn.“

Annar leikmaður West Ham, Kevin Nolan, ólst upp sem stuðningsmaður Liverpool og var í unglingaliði félagsins í fimm ár. Hann hefur enn sterkar taugar til félagsins og mun reyna sitt besta til að hjálpa því.

„Ég held að ég myndi fagna með þeim ef þeir ynnu deildina,“ sagði hinn 31 árs gamli miðjumaður West Ham.

„Við erum með leikmenn sem voru í Liverpool og mín tengsl við félagið eru augljós. Það væri ljúft að enda tímabilið með því að hjálpa þeim.

„Ég vona að við gerum það en fyrst og fremst viljum við stigin þrjú. Þá endum við í þeirri stöðu sem við erum í og þar viljum við vera,“ sagði Nolan en West Ham mun hafna í 12. sæti vinni liðið í dag en liðið gæti fallið niður í 15. sæti með tapi.

Liverpool er tveimur stigum á eftir City fyrir umferðina í dag og þarf að vinna Newcastle á sama tíma og City þarf að tapa til verða meistari. City er því með titilinn í höndunum þegar flautað verður til leiks í dag.