Mourinho: Dzeko bestur ekki Suarez

Jose Mourinho knattspyrnustjóri Chelsea segir Luis Suarez ekki hafa átt skilið að vera valinn knattspyrnumaður ársins á Englandi, hvorki hjá blaðamönnum né samtökum leikmanna sem bæði hafa útnefnt hann bestan á vormánuðum.

Mourinho er á því að Edin Dzeko framherji Manchester City hafi verið besti leikmaðurinn á tímabilinu.

„Hann skorar ekki bara mörk. Hann leggur upp mörk. Spilar rétt, hagar sér á vellinum og er sanngjarn. Hann hendir sér ekki niður og reynir að fiska andstæðinga útaf. Ég hefði valið Dzeko,“ sagði Mourinho og bætti við að besti leikmaðurinn ætti alltaf að koma úr meistaraliðinu.

Ef Liverpool nær að landa titlinum í dag myndi Mourinho frekar velja Steven Gerrard en Suarez.

„Leikmaður ársins á alltaf að koma frá meisturunum og ef það verður Manchester City þá myndi ég velja Dzeko.

„Hann var þriðji framherji liðsins í byrjun tímabilsins en þegar liðið þurfti á honum að halda, á mikilvægu augnabliki á tímabilinu, réð hann úrslitum. Sextán mörk frá þriðja framherja er einstakt.

„Ef Liverpool vinnur, það þyrfti ekki kraftaverk til, myndi ég velja Steven Gerrard. Hann hefur verið mjög góður í mikilvægri stöðu í liðinu og breytt leikstíl sínum.