Ferdinand fer frá United í sumar

Enska blaðið Daily Mail staðhæfir á heimasíðu sinni í kvöld að Rio Ferdinand hafi spilað sinn síðasta leik fyrir Manchester United.

Núverandi samningur Ferdinand rennur út í sumar og er fullyrt að félagið hafi ákveðið að bjóða honum ekki framleningu. Ferdinand, sem er 35 ára, mun hafa fengið fréttirnar um helgina.

Ferdinand kom til United fyrir tólf árum síðan og var dýrasti leikmaður enskrar knattspyrnu þegar félagið keypti hann frá Leeds fyrir 29,1 milljón punda. Hann kom við sögu í 455 leikjum fyrir Manchester United.

Samkvæmt Daily Mail er líklegast að Ferdinand fari frá Englandi í sumar og taki tilboði um að spila í Bandaríkjunum, Kína eða miðausturlöndum.

Uppfært 20.18: Manchester United hefur staðfest fréttina á heimasíðu sinni.