Kompany: Í dag er Manchester blá og það er falleg sjón | Myndir

Leikmenn og stuðningsmenn Manchester City máluðu bæinn bláan í gær þegar félagið hélt upp á Englandsmeistartitilinn með sigurbílferð um miðbæinn.

Manchester City tryggði sér titilinn með sigri á West Ham á sunnudaginn en liðið vann upp forskot Liverpool á lokasprettinum þar sem liðið átti leiki inni.

Fyrirliðinn Vincent Kompany var kátur á sigurhátíðinni í samtali við blaðamann Manchester Evening News. "Í dag er Manchester blá og það er falleg sjón. Himinn er blár, göturnar eru bláar og eins og allir vita þá er máninn blár líka," sagði Vincent Kompany.

Kompany hrósaði jafnframt jákvæðninni sem bæði leikmenn og stuðningsmenn félagsins höfðu að leiðarljósi á þessu tímabili þar sem City-liðið endurheimti titilinn sem liðið vann fyrir tveimur árum.

Hér fyrir neðan má sjá myndir frá sigurhátið leikmanna og stuðningsmanna Manchester City í gær.