Pochettino til í að verða knattspyrnustjóri Gylfa

Mauricio Pochettino, knattspyrnustjóri Southampton, gerði frábæra hluti með liðið á tímabilinu og hefur nú verið sterklega orðaður við stjórastöðuna hjá Tottenham.

Tottenham lét Tim Sherwood fara í gær og stjórnarformaðurinn Daniel Levy er nú að leit að sínum tíunda stjóra á þrettán árum sínum í starfinu.

Pochettino er efstur á blaði samkvæmt fréttum enskra miðla og Guardian slær því upp í morgun að Mauricio Pochettino sé spenntur fyrir því að gera knattspyrnustjóri Gylfa Þórs Sigurðssonar og félaga í Tottenham.

Southampton-liðið er á tímamótum því allt bendir til þess að félagið selji tvær af stærstu stjörnum sínum, Luke Shaw og Adam Lallana.

Það yrði mikið áfall fyrir Southampton að missa tvær framtíðarstjörnur og stjórann á einu sumri en undanfarin ár hefur félagið selt frá sér kappa eins og Theo Walcott, Gareth Bale og Alex Oxlade-Chamberlain.

Tottenham er að skoða fleiri möguleika en bæði Frank de Boer hjá Ajax og Rafael Benítez hjá Napoli hafa verið orðaðir við starfið.