Sögulegur sigur Sunderland

Fyrr í dag bar Sunderland sigurorð af Manchester United á Old Trafford með einu marki gegn engu. Sigurinn var gríðarlega mikilvægur fyrir Sunderland í botnbaráttu ensku úrvalsdeildarinnar, en liðinu nægir væntanlega að vinna annan af þeim tveimur leikjum sem það á eftir til að halda sæti sínu í deildinni.

Sigurinn í dag var ekki síður merkilegur fyrir þær sakir að þetta var fyrsti sigur Sunderland á Manchester United í deildarkeppni í 17 ár.

Laugardaginn 8. mars 1997 skoruðu Michael Gray og John Mullin mörk Sunderland í 2-1 sigri á Englandsmeisturum Manchester United á Roker Park, gamla heimavelli Sunderland. Á varamannabekk United sat núverandi þjálfari liðsins, Ryan Giggs, en hann er eini "eftirlifandinn" frá leiknum fyrir 17 árum.

Sigurinn í dag var jafnframt fyrsti sigur Sunderland á Old Trafford í deildarkeppni frá árinu 1968, en þann 11. maí fyrir 46 árum mættust liðin í lokaumferð efstu deildar.

Colin Suggett og George Mulhall tryggðu Sunderland óvæntan 2-1 sigur á stjörnum prýddu liði Manchester United, en ósigurinn gerði út um vonir United-manna að vinna Englandsmeistaratitilinn annað árið í röð. George Best skoraði mark United í leiknum.

Stuðningsmenn United fengu þó ágætis sárabót nokkrum dögum seinna þegar liðið tryggði sér sæti í úrslitaleik Evrópukeppni Meistaraliða eftir 3-3 jafntefli gegn Real Madrid á útivelli. Í lok maí unnu Best og félagar síðan Benfica á Wembley í úrslitaleiknum og urðu þar með fyrsta enska liðið til að hampa Evrópubikarnum.