Pellegrini: Þetta er ekki búið

Manchester City færðist nær Englandsmeistaratitlinum í knattspyrnu í gærkvöldi án þess að spila en Liverpool gerði þá ótrúlegt 3-3 jafntefli gegn Crystal Palace eftir að komast yfir í leiknum, 3-0.

City verður meistari vinni það síðustu tvo leiki sína í deildinni, gegn Aston Villa og West Ham, en það mætir Villa á heimavelli annað kvöld.

„Ég horfði ekki á leikinn,“ sagði Manuel Pellegrini, knattspyrnustjóri Manchester City, á blaðamannafundi í dag aðspurður hvort hann hefði séð Liverpool fella sjálft sig á Selhurst Park.

„Þetta eru bara ein úrslit af mörgum í deildinni. Það er erfitt að vinna leiki í úrvalsdeildinni. Maður getur aldrei verið viss fyrr en það er flautað af. Crystal Palace er gott lið sem er á flugi þessa stundina.“

Sílemaðurinn heldur þó áfram að tala niður meistaravonir Manchester City þrátt fyrir að liðið eigi tvo nokkuð þægilega leiki eftir.

„Ég sagði eftir tapið gegn Liverpool að við yrðum að halda áfram því hin liðin myndu tapa stigum. Nú verðum við að vinna Aston Villa og svo sjáum við í lok vikunnar hvaða lið verður með flest stig. Við höldum bara áfram að undirbúa okkur eins og við höfum gert fyrir alla leiki.“

„Þetta verður erfiður leikur því öll þessi lið eru undir pressu. Fullt af fólki sagði að Everton myndi ekki vilja vinna okkur því það myndi hjálpa Liverpool en við lentum í mjög erfiðum leik á móti þeim,“ sagði Manuel Pellegrini.