Moyes: Verðum í engum vandræðum að kaupa leikmenn

David Moyes, knattspyrnustjóri Manchester United, segir að leikmannakaup verði ekki erfiðari hjá félaginu í sumar þrátt fyrir að liðið verði ekki í Meistaradeildinni.

United er úr leik í Meistaradeildinni í ár eftir 3-1 tap gegn Bayern München í gærkvöldi. Þá er liðið í sjöunda. sæti úrvalsdeildarinnar á Englandi og vægast sagt ólíklegt að liðið nái fjórða sætinu.

Þrátt fyrir að United verði ekki í Meistaradeildinni í fyrsta skiptið í 18 ár telur Moyes að það hafi ekki áhrif á hvaða leikmenn vilji koma til félagsins.

„Þeir leikmenn sem við höfum rætt lauslega við eru meira en tilbúnir að koma til Manchester United. Félagið hefur aldrei átt í neinum vandræðum. Við leitumst nú eftir að því að eyða peningum í leikmenn sem eru lausir og það tengist Meistaradeildinni ekkert,“ sagði David Moyes eftir leikinn í gær.