Eriksen bjargaði stigi fyrir Spurs | Myndband

Tottenham er þrem stigum á undan Man. Utd eftir að hafa kreist út eitt stig á útivelli gegn WBA. Jöfnunarmark Spurs kom í uppbótartíma.

Leikmenn Tottenham mættu vankaðir til leiks. Matej Vydra kom WBA yfir eftir aðeins 27 sekúndur af leiknum. Sending fyrir og hann kláraði í teignum.

Þetta mark vakti ekki leikmenn Tottenham því rúmum þrem mínútum síðar var Chris Brunt búinn að bæta við marki fyrir heimamenn. 2-0 og ekki búnar fimm mínútur af leiknum.

Spurs fékk tækifæri til þess að komast inn í leikinn er það fékk víti. Emmanuel Adebayor tók vítið en það var hörmulegt.

Það kom í bakið á þeim er Stephane Sessegnon stakk alla vörn Spurs af og skoraði. Tottenham fékk aftur á móti líflínu skömmu síðar er Jonas Olsson skoraði sjálfsmark. Sending fyrir og af fæti Olsson fór boltinn í netið.

Tuttugu mínútum fyrir leikslok færðist síðan heldur betur fjör í leikinn á ný. Harry Kane minnkaði þá muninn í 3-2 með skalla eftir frábæran undirbúning frá Aaron Lennon.

Gylfi Þór Sigurðsson kom af bekknum rúmum tíu mínútum fyrir leikslok er Spurs freistaði þess að sækja grimmt. Þegar rúmar þrjár mínútur voru komnar fram yfir venjulegan leiktíma náði Christian Eriksen að jafna metin með laglegu skoti í teignum.