Hull City í fyrsta sinn í bikarúrslit

Hull City komst í dag í fyrsta sinn í sögu félagsins í úrslit FA bikarsins eftir fjörugan 5-3 sigur á Sheffield United á Wembley. Það verður því Hull sem mætir Arsenal í úrslitunum en leikurinn fer fram þann 17. maí næstkomandi.

Þrátt fyrir að vera í c-deildinni geta leikmenn Sheffield United borið höfuð sitt hátt eftir gengi þeirra í bikarkeppninni í ár. Liðið sló bæði út Fulham og Aston Villa á leiðinni á Wembley.

Það leit allt út fyrir að Hull yrði þriðja úrvalsdeildarliðið sem Sheffield myndi ná að slá út þegar þeir náðu í tvígang forystunni í fyrri hálfleik. Jose Baxter náði forskotinu eftir nítján mínútna leik með góðu skoti. Yannick Sagbo jafnaði metin fyrir Hull rétt fyrir hálfleik en gestirnir frá Sheffield voru ekki lengi að svara. Úr miðjunni keyrðu þeir upp í sókn og komust strax yfir með skallamarki Stefans Scougalls aðeins mínútu eftir jöfnunarmark Sagbo.

Eitthvað hefur Steve Bruce, knattspyrnustjóri Hull lesið pistilinn yfir sínum mönnum í hálfleik því allt annað var að sjá til liðsins í seinni hálfleik. Á rúmlega korteri breyttu leikmenn Hull stöðunni með þremur mörkum frá Matt Fryatt, Tom Huddlestone og Stephen Quinn.

Sheffield United minnkaði muninn þegar Jamie Murphy kom af fjærstöng og lagði boltann í netið á lokamínútu venjulegs leiktíma. David Meyler gerði hinsvegar út um allar vonir leikmanna Sheffield með marki úr góðri skyndisókn í uppbótartíma og tryggði sæti Hull í úrslitum bikarsins.