Sigur fyrir okkar stefnu sama hvernig fer

Spennan er heldur betur farin að magnast fyrir leik Liverpool og Man. City í ensku úrvalsdeildinni á morgun.

Brendan Rodgers, stjóri Liverpool, segir að sama hvernig fari þá sé þetta tímabil sigur fyrir stefnu Liverpool. Félagið búi til leikmenn á meðan Man. City hafi eytt ótrúlegum upphæðum í leikmannakaup.

"Þetta tímabil, sama hvar við endum, er svo sannarlega sigur fyrir okkar stefnu. Við búum til leikmenn. Lítið á okkar leikmenn, hvernig þeir kunna á kerfið okkar, hvernig eldri leikmennirnir hafa lengt sinn feril og tekið stöðugum framförum. Við teljum að það módel sem við höfum byggt upp hér muni skila félaginu árangri til lengri tíma," sagði Rodgers.

"Ég ætla alls ekki að gera lítið úr Man. City en það er samt staðreynd að liðið hefur komist þar sem það er með því að eyða mikið af peningum. Þeim peningum hefur verið vel eytt í gæðaleikmenn og það hefur skilað félaginu titlum. Ég efast því ekki um að stuðningsmennirnir eru ánægðir."