Manchester United býður Kroos 49 milljónir í vikulaun

Guardian hefur heimildir fyrir því að Manchester United sé tilbúið að bjóða þýska miðjumanninum Toni Kroos 260 þúsund pund í vikulaun, tæplega 49 milljónir íslenskra króna, til að reyna að tæla hann frá Bayern München í sumar.

Bayern München segir að Toni Kroos sé ekki til sölu en hann sjálfur hefur opinberlega talað um að hann vilji fá mun betri samning en hann er á í dag. Toni Kroos er með samning við Bayern München til ársins 2015.

Wayne Rooney er launahæsti leikmaður Manchester United í dag með um 300 þúsund pund á viku en hinn 24 ára gamli Kroos myndi með þessu verða í fámennum hópi þeirra launahæstu með mönnum eins og Rooney og Robin van Persie.

Það hefur lítið gengið á fyrsta tímabili David Moyes með Manchester United og öllum ljóst að hann þarf að styrkja liðið ekki síst á miðjunni þar sem United-liðið hefur oft átt erfitt uppdráttar í vetur.  

Toni Kroos hefur verið orðaður við Manchester United í nokkurn tíma og þær raddir urð enn háværari eftir að hann átti tvo flotta leiki þegar liðin mættust í tveimur leikjum í átta liða úrslitum Meistaradeildarinnar.