Mourinho ætlar að kaupa framherja í sumar

Jose Mourinho, stjóri Chelsea, hefur gefið til kynna að framlína liðsins verði tekin í gegn í sumar.

Chelsea gaf verulega eftir í titilbaráttunni um helgina er liðið tapaði fyrir nýliðum Crystal Palace, 1-0. Liverpool færði sér tapið í nyt og skellti sér á toppinn með 4-0 sigri á Tottenham.

Miðjumenn Chelsea hafa að mestu séð um markaskorun þeirra bláklæddu á tímabilinu en framherjarnir Samuel Eto'o (8 mörk), Fernando Torres (4 mörk) og Demba Ba (3 mörk) ekki komist almennilega í gang í deildinni.

„Ég held að þetta sé ekki endilega tímabært að ræða þessi mál núna en það er öllum ljóst að Chelsea vill kaupa sóknarmann í sumar,“ sagði Mourinho við enska fjölmiðla.

„Hver er framtíð hinna sóknarmannanna? Þeir verða áfram og keppa um stöður í liðinu við þá sem koma. Svo verða þeir sem lítið fá að spila yfirleitt óánægðir með sína stöðu og vilja því ef til vill skipta um umhverfi,“ bætti hann við.