Ruud Gullit: Tottenham er búið að ganga frá Van Gaal

Ruud Gullit, fyrrum leikmaður og stjóri Chelsea, segir að Tottenham sé þegar búið að ganga frá því að Louis van Gaal verði knattspyrnustjóri Tottenham í sumar.

Tim Sherwood er núverandi knattspyrnustjóri Gylfa Þórs Sigurðssonar og félaga og fékk 18 mánaða samning í desembermánuði. Hann tók við þegar Andre Villas-Boas var rekinn snemma á leiktíðinni.

Louis van Gaal er 62 ára gamall og mun stýra hollenska landsliðinu fram yfir HM í Brasilíu í sumar. Van Gaal hefur gríðarlega reynslu en hann hefur stýrt liðum eins og Ajax, Barcelona, AZ Alkmaar og Bayern München.

„Ég veit það fyrir víst að stjórnarformaður Tottenham (Daniel Levy) var í heimsókn í húsi Van Gaal. Ég held að það sé búið að ganga frá þessu en maður veit samt aldrei," sagði Ruud Gullit við BBC.

Tottenham hefur unnið 10 af 21 leik undir stjórn Sherwood á leiktíðinni en liðið er í 6. sæti ensku úrvalsdeildarinnar sjö stigum frá Meistaradeildarsæti.