Anelka neitar sök

Frakkinn Nicolas Anelka hefur svarað kæru enska knattspyrnusambandsins sem kærði hann fyrir ósæmilega hegðun í leik með West Brom á dögunum.

Anelka fagnaði marki sem hann skoraði í leik gegn West Ham í lok síðasta mánaðar með því að líkja eftir nasistakveðju. Það gerði hann í því skyni að styðja baráttu fransks grínista við frönsk stjórnvöld.

Verði Anelka fundinn sekur á hann yfir höfði sér að minnsta kosti fimm leikja bann en hann ákvað að neita kærunni í dag. „Ég er hvorki gyðingahatari né haldinn kynþáttafordómum,“ skrifaði Anelka á Facebook-síðuna sína. „Ég bið því enska knattspyrnusambandið um að draga kæruna til baka.“

Málið verður formlega tekið fyrir í náinni framtíð og fær Anelka þá tækifæri til að tala sínu máli.