Everton ekki eftirbátur Liverpool

Tvö mörk Steven Naismith á fyrsta hálftímanum gerði Everton auðvelt fyrir í 4-0 sigri á Stevenage í enska bikarnum í dag.

Hinn skoski Naismith skoraði strax eftir sex mínútur eftir mikinn atgang í teig heimamanna. Stuðningsmenn C-deildarliðsins, sem sáu sína menn slá út Newcastle á sama vettvangi fyrir þremur árum, urðu heldur svartsýnir er Naismith skoraði aftur á 32. mínútu eftir undirbúning varamannsins Leon Osman.

Hollendingurinn Johnny Heitinga nýtti tækifærið í liði Everton í dag og skoraði þriðja markið eftir tíu mínútna leik í síðari hálfleik en heiðurinn að markinu átti Belginn Kevin Mirallas. Það var svo varamaðurinn Magaye Gueye sem innsiglaði sigurinn fimm mínútum fyrir leikslok.

Everton verður því í pottinum þegar dregið verður í fimmtu umferð keppninnar á morgun. Þeir bláklæddu eiga svo stórleik fyrir höndum í næstu viku þegar þeir mæta grönnunum í Liverpool í ensku úrvalsdeildinni.

Liverpool tryggði sér einnig sæti í 5. umferðinni fyrr í dag þegar liðið vann 2-0 sigur á Bournemouth.