De Jong á leið til Newcastle

Svo virðist sem að Luuk de Jong, leikmaður Gladbach í Þýskalandi, verði lánaður til Newcastle út leiktíðina.

Newcastle er á góðri leið með að ganga frá sölu á Yohan Cabaye til PSG í Frakklandi en hann mun gangast undir læknisskoðun í Frakklandi á næstunni.

Gladbach tilkynnti í morgun að De Jong væri á leið til Englands til að fara í læknisskoðun hjá Newcastle. Hann er 23 ára gamall og kom frá FC Twente í sumar.

De Jong var á óskalista Alan Pardew, stjóra Newcastle, í sumar en ákvað að fara frekar til Þýskalands. Þar hefur hann hins vegar átt erfitt uppdráttar.

Newcastle er einnig sagt á höttunum eftir tveimur miðjumönnum til viðbótar - þeim Remy Cabella hjá Montpellier og Clement Grenier, leikmanni Lyon.