Allardyce gagnrýndi fyrirliðann sinn

Sam Allardyce, stjóri West Ham, var allt annað en sáttur við Kevin Nolan, fyrirliða liðsins, eftir 2-1 tapið gegn Fulham í dag.

Nolan var rekinn af velli undir lok fyrri hálfleiks og reyndist það vendipunktur leiksins. West Ham hafði komist yfir strax á sjöundu mínútu en eftir tapið í dag er liðið enn með fimmtán stig í næstneðsta sæti deildarinnar.

„Fyrirliðinn okkar sýndi mikið ábyrgðarleysi í dag - og ekki bara í dag heldur fyrir næstu leiki þar sem hann verður í leikbanni,“ sagði Allardyce við fjölmiðla eftir leikinn í dag.

„Hann brást öllum og sjálfum sér líka. Þetta var vendipunktur leiksins,“ bætti hann við.

„Kevin er reyndur leikmaður og þetta kom mér á óvart því hann fór í glórulausa tæklingu í leiknum gegn Liverpool. Hann hefur því fengið tvö rauð spjöld með skömmu millibili.“

„Það er eitthvað sem ég get ekki umborið. Þetta er mikið áfall fyrir liðið.“